DAVAO DEL SUR-Nasuta sa National Bureau of Investigation (NBI) nga mokabat sa 200 ka peke nga birth certificates ang gi-isyu sa civil registry sa Sta. Cruz, Davao del Sur, nga kasagaran mga Chinese national.
Matud pa ni NBI Region 11 Director Archie Albao, nga ang nasakmit nga peke nga mga dokumento gi-issue gikan sa 2018 ngadto sa tuig 2019.
Sa pagkakaron, nagpadayon ang ilang imbestigasyon sa mga peke nga birth certificate nga gi-isyu sa mga langyaw.
Kung adunay ebidensya, tukma nga mga kaso ang ipasaka batok sa mga responsable nga indibidwal.
Base sa NBI RD, nadiskubrehan ang mga pekeng dokumento atol sa ilang imbestigasyon ug pakigtambayayong sa ubang ahensya sa gobyerno sama sa Philippine Statistics Authority, Bureau of Immigration ug mga lokal nga kagamhanan.
Dugang pa, kini adunay kalabotan sa pagkasikop sa usa ka Chinese national sa buhatan sa DFA sa siyudad sa Davao niadtong Hulyo.
