Gikataho nga 22 ka tawo ang namatay ug 24 ang naangol human mabangga ang usa ka bus ug cargo truck sa usa ka highway sa Makaueni, Kenya, niadtong Domingo, Oktubre 25.
Base sa imbestigasyon sa lokal nga kapulisan, gikan sa usa ka lubong ang mga pasahero sa bus sa dihang nahitabo ang aksidente.
Ang mga naangol padayong gitambalan sa mga ospital.
Hinuon, sumala ni Makueni County Commissioner Abdullahi Khalif, posible pang modaghan ang ihap sa mga namatay.
Wala pa matino ang hinungdan sa aksidente, apan gitan-aw sa kapulisan ang posibleng pagpadagan sa sakyanan sa kusog nga tulin ug ang dili maayong kondisyon sa dalan isip mga hinungdan niini.
Tulo ka semana sa wala pa ang maong aksidente, laing bangga ang nahitabo sa samang haywey nga nagdugtong sa siyudad sa Mombasa ug sa kaulohan nga Nairobi, diin 17 ka tawo ang namatay.
Matod sa mga awtoridad, kanunayng mahitabo ang mga aksidente sa maong bahin sa haywey, nga giila isip “accident black spot” o lugar diin kanunay mahitabo ang mga aksidente.
