Gisentensiyahan sa usa ka korte sa Kenya ang lider sa usa ka kulto nga si Paul Mackenzie og 200 ka tuig nga pagkabilanggo tungod sa kamatayon sa 190 ka mga bata, kinsa giingong gipagutom hangtod namatay subay sa iyang mando.
Gipagawas ang sentensiya sa Mombasa High Court niadtong Biyernes, Nobyembre 6, human nakit-an nga sad-an si Mackenzie sa kasong pagpatay pinaagi sa pagpagutom ug direktang pagpatay (homicide).
Matod sa mga prosecutor, si Mackenzie—kinsa nangulo sa Good News International Church—nagmando sa iyang mga sumusunod ug sa ilang mga anak nga hunongon ang pagkaon aron makaabot sa langit sa dili pa ang giingong katapusan sa kalibotan.
Gipahibalo usab sa mga awtoridad nga ang pipila sa mga biktima gibunalan, gikulong, ug gihikawan sa pagkaon ug tubig. Ang uban nakit-an nga gilubong sa mabaw nga mga lubnganan, samtang ang uban giingong gilubong nga buhi pa.
Napulo’g walo ka mga kauban ang nakit-an usab nga sad-an ug gisentensiyahan og pagkabilanggo nga nagkalainlain gikan sa 10 hangtod 160 ka tuig.
Ang habig sa depensa mipadayag sa ilang intensiyon nga moapelar sa maong hukom.
Ang kaso nakapakurat sa Kenya niadtong 2023 human nagsugod ang kapulisan sa pagdiskobre og mga patayng lawas sa Shakahola Forest. Sumala sa Kenya National Commission on Human Rights, mokabat sa 448 ka mga patayng lawas ang narekober gikan sa maong lugar.
Nag-atubang usab si Mackenzie og laing kaso nga naglambigit sa 52 pa ka gituohang mga biktima.
