CENTRAL VISAYAS-Nasakmit sa mga sakop sa National Bureau of Investigation-Central Visayas (NBI-7) ang 228 ka sinako nga mga “ukay-ukay,” diin iligal nga gi-import gikan sa South Korea niadtong Miyerkules, Pebrero 26.
Matud ni Regional Director, Atty. Rennan Augustus Oliva, nga ang retrieval operation sa NBI gihimo niadtong Pebrero 20, sa ready-to-wear (RTW) shop sa Barangay Kalubihan, dakbayan sa Sugbo, human ang establisemento napakyas sa pagpresentar og permit o lisensiya sa pag-import sa maong mga butang.
Nasayran usab nga mokabat sa 752-thousand pesos ang kantidad sa mga nasakmit nga illegally imported.
Kasong paglapas sa Republic Act 4653, nga nagdili sa commercial importation sa textile articles nga sagad nailhang used clothing ug trapo, ang gipasaka batok kang alyas “Julia,” ang Filipino-Chinese nga tag-iya sa RTW shop.
Gipahimangnoan usab ni Oliva ang publiko nga ‘magmabinantayon’ sa pagpalit sa mga gamit nga sinina o ukay-ukay, tungod kay mamahimo kini nga peligro sa kahimsog.
Dugang pa, ang NBI magpadayon sa ilang imbestigasyon, tungod kay dako ang posibilidad nga ang mga kontrabando, sama sa ilegal nga drugas, makalusot sa nasud gamit ang susamang mga pamaagi.
