CEBU CITY — Gipaabot pa karon ang medical result sa usa ka 23 anyos nga gi-gang rape sa 3 ka mga menor edad sa may dakbayan sa Naga.
Matud ni Patrolwoman Carlene Cabesares sa Naga Police Station nga ila pang gihuwat karon ang resulta sa medical examination sa biktima kinsang padayon usab nga nagpaalim sanglit gidunggab usab kini sa mga suspect.
Una niini, gisaysay sa biktima nga mipugos ug sulod ang 3 ka suspect nga nga naa sa edad nga 15 ug 16 anyos sa iyang kwarto pasado alas 2 na sa kaadlawon niadtong Hunyo 1 ug sa dihang nakasulod didto na gipanamastamasan ang iyang pagkababae.
Wala na matud pa kini makasukol tungod kay gihadlok usab sa mga suspect nga patyon ang iyang anak.
Wala usab niadtong higayona ang bana sa biktima tungod kay nagtrabaho man kini.
Human matud pa sa panghitabo nakagawas an biktima sa ilang balay ug nagpatabang kini sa silingan hinungdan nga ang silingan ang misumbong sa ilang tanod ug mao na kini ang misumbong sa pulis.
Dali usab nga naila sa mga mirespondeng pulis ang mga suspect human nga natudlo sa biktima.
Sikop diha-diha dayon ang 3 ka mga menor de edad ug temporaryong nakadetain sa Naga Police Station tungod kay under construction pa ang holding area sa DSWD sa Naga.
Ipaubos usab kini sa examination aron sa pagsuta kung nasayod ba kini sa ilang gibuhat ug ayha na kini pasakaan og tukmang kaso. (FDP/GN)
