Fully operational na ang ikaduhang runway sa Mactan-Cebu International Airport (MCIA) sukad niadtong adlaw sa Biyernes, Hulyo 18, 2025.
Kini ang gianunsyon sa Mactan-Cebu International Airport Authority (MCIAA) diin ang 2nd runway kay adunay number 04L/22R.
Nakahimo sa kasaysayan ang Jeju Air flight number 7C 2177 nga gikan sa Incheon, South Korea isip pinakaunang commercial aircraft nga mitugpa ang maong runway niadtong alas 3:34 sa buntag samtang ang Cebu Pacific flight number 5J 5108 bound to Osaka, Japan ang unang mi-take off pag alas 3:42 sa buntag sa susamang adlaw.
Kini kay adunay parallel orientation sa unang runway sa kinatibuk-ang gitas-on nga 2,560 meters nga gisumpayan pinaagi sa perpendicular taxiway nga adunay gitas-on 237 meters ug gilapdon sa 23 meters.
Nagtimaan kini sa makasaysayanong higayon sa tugpahanan sa Sugbo diin gawas sa kini ang pinakauna sa tibuok Pilipinas nga adunay parallel runway kay hilabihan sab kining magamit sa higayong scheduled maintenaince o urgent repair works sa unang runway susama sa nahitabo sa nakalabayng semana.
