Kapin 3.3 milyones ka indibidwal gikan sa kapin 900,000 ka pamilya ang naapektuhan sa bag-o lang nga kalamidad sa nasud.
Basi sa datus sa National Disaster Risk Reduction and Management Council (NDRRMC), kapin sa 1.1 milyones ka indibidwal o 270,000 ka pamilya ang namakwit ug mibakwit sa mga evacuation centers o ubang lugar.
Sa datus sa ahensya, aduna sila’y natala nga 16 ka casualty, diin 10 niini ang kompirmadong patay samtang 6 ang padayon pa nga gi-validate diin hinungdan sa ilang kamatayon tungod sa pagdahili sa yuta o pagkalumos.
Bisan pa nga anaa na sa 34 ang namatay nga natala sa PNP, gipasabot sa NDRRMC nga ang gikataho nga mga kaswalti gipailawom sa hingpit nga validation, busa gilauman nga modaghan pa ang gidaghanon sa umaabot nga mga adlaw.
Sa laing bahin, 104 ka mga lugar sa nasud ang gipailalom sa state of calamity tungod sa kadako sa kadaot nga gibilin sa bag-ohay nga mga bagyong Carina, Butchoy ug Habagat.
Niini, 57 sa Central Luzon, 24 sa Calabarzon, 17 sa NCR, 3 sa Mimaropa, 2 sa Soccsksargen ug 1 sa Davao.
