CEBU – Walay natala nga kaso sa coronavirus disease (Covid-19) sukad sa pagsugod sa school year niadtong Agosto ang tanang publikong tunghaan sa mga dakbayan sa Sugbo, Lapu-Lapu ug Mandaue, matod sa mga opisyal sa lokal nga edukasyon.
Kini ang gibutyag ni Rhea Mar Angtud, ang Cebu City Schools Division superintendent, nga wala silay nadawat nga taho sa mga estudyante nga nagpositibo sa Covid-19 sukad niadtong Agosto.
Kini gumikan sa hiniusang paningkamot sa mga magtutudlo, mga estudyante ug mga ginikanan, ug uban pang mga kauban, sa paghimo og maayo nga pagkaplano nga mga lakang aron masiguro ang kahimsog ug kaluwasan sa mga estudyante sa mga eskuylahan.
Sa sayo pa gibutyag ni DepEd 7 Director Salustiano Jimenez nga lakip sa mga lakang nga ilang gimando sa mga tunghaan nga ipatuman mao ang pagsiguro sa mga lugar nga panghugas sa kamot ug pagsiguro nga adunay alcohol, face mask ug uban pang sanitation equipment nga magamit sa mga estudyante.
Iyang gisubli usab nga ang mga tinun-an dili na kinahanglan nga mopresentar og medical certificate sa ilang pagbalik sa eskwelahan sanglit misalig siya sa mga ginikanan nga dili mamakak sa sakit sa ilang mga anak o mopahimulos sa kahigayonan.
Samtang ang mga publikong tunghaan sa dakbayan sa Lapu-Lapu wala usab naka-report sa bisan unsang kaso sa Covid nga naglambigit sa mga estudyante.
