Cebu City- Napasakaan na og kaso ang 3 ka mga babaye nga nadakpan nga misuway sa pagpalusot sa mga iligal nga drogas sulod sa Cebu City Jail.
Gibutyag ni Cebu City Councilor Dave Tumulak nga nabalhog na karon sa Cebu City Jail Female Dorm sila si Marlyn Estorgio ug Frace Abella human wala makapyansa ug 200,000 ka pesos bugti sa ilang temporaryong kagawasan samtang non bailable naman ang kaso ni Violeta Bacus kinsang nakuhaan ug kapin 70 gramos sa shabu.
Nasayran nga niadtong Sabado pa nadakpan sila si Estorgio ug Bacus human nga makuhaan ug shabu nga gipasok sa ilahang kinatawo samtang niadtong Dominggo usab nakuhaan ug ubay ubay nga ampule sa nubain si Abella nga gisagol niini sa peanut butter spread.
Matud ni Konsehal Dave Tumulak nga naa na silay pangalan sa mga piniriso nga hatdan unta sa mga suspek sa mga kontrabando apan nagdumile usa kini nga nganlan sa publiko sanglit nagpadayon pa ang imbestigasyon.
