CEBU-Dili ma-ihap sa mga tudlo ang gidaghanon sa mga tawo nga misalmot sa gipahigayon nga solemn foot procession nga mikabat ug tulo ka oras ug 40 ka minutos.
Gibana-bana nga dili mu-ubos sa 3 million ka mga deboto ang milagbas sa kapin lima ka kilometro nga gilay-on alang sa naasoy nga prosisyon.
Gibutyag ni Police Colonel Ireneo Dalogdog, ang director sa Cebu City Police Office, nga hilabihan ka puno sa mga tawo ang kalsada, butang nga daan na usab nilang gipangandaman.
Matud pa, duha ka tuig na nga wala mapahigayon ang Sinulog Festival sa syudad sa Sugbo hinungdan nga ilaha nang gilauman ang pagdagsa sa mga deboto sa solemn foot procession.
Bisan pa man niini, nahimong ‘generally peaceful’ ang pagpahigayon sa naasoy nga aktibidad, gawas na lang sa pipila ka mga deboto nga nakuyapan gumikan sa hilabihan ka daghan sa tawo, apan dali usab kini nga narespondihan sa mga sakop sa Emergency Rescue Unit Foundation ug uban pang mga medical team.
