CEBU CITY – Nasikop sa National Bureau of Investigation (NBI) 7 ang tulo ka mga Romanian national nga suspek sa nahitabong ATM Skimming sa Land Bank of the Philippines dito sa lungsod ng Cebu.
Ang mga suspek ang giila nga sila si Razvan Stanco Arelian, Cosel Ion, ug Ionut Alessandro.
Gibutyag ni NBI Special Agent Florante Gaoiran nga dakong tabang sa pag-identify ug pagkasikop sa mga suspek ang mga nakuha nga CCTV footage gikan sa usa ka branch sa LBP nga gibutangan og skimming device sa mga suspek.
Pinaagi sa search warrant nga pirmado ni Hon. Judge Generosa Labra sa Branch 23 sa Regional Trial Court, gisusi sa NBI ang gi-abangan niini nga condominium sa Brgy Lahug, dakbayan sa Sugbo kung diin nakuha ang mga micro chips, card reader, skimming device, laptop ug cellphone.
Nakuha usab sa mga operatiba ang mga ATM cards nga gibalhinan sa mga impormasyon nga nakuha gikan sa usa ka skimmed ATM card nga mao usab ang gigamit sa ilahang pag-withdraw sa account sa mga biktima.
Gidudahan usab sa NBI nga ang tulo ka mga Romanian ang suspek gumikan kay nakuha usab sa mga operatiba ang sinina ug sakyanan nga gigamit sa usa sa mga suspek nga si Ionut Alessandro nga nakita sa CCTV footage.
Matud pa ni Goairan nga dako ang posibilidad nga miyembro sa usa ka international syndicate ang mga suspek gumikan kay nagbalhin-balhin na kini og nasud.
Gawas sa tulo ka mga nadakpan, padayon pa usab nga gisubay karun sa NBI ang nahimutangan sa uban pang mga kaubanan niini.
Sa pagkakarun, gikustodiya na sa NBI ang mga suspek samtang gipahigayon ang dugang imbestigasyon ang mga otoridad.
Nasayran nga midangop sa buhatan sa NBI ang kadagkuan sa Land Bank of the Philippines niadtong adlaw nga Huwebes human nga nasayran nga daghan sa ilahang mga kliyente ang nabiktima sa ATM skimming.
