Labing menos 30 ka mga Palestinian ang namatay sa pagpamusil sa mga militanteng Israeli samtang naghulat sila sa humanitarian aid sa amihanang Gaza sumala pa sa tigpamaba niini sa civil defense ministry.
Matod pa nga 300 ka uban pang mga indibidwal ang nasamdan usab sa way kalouy nga pagpamusil sa mga Israeli.
Apan, ang Israeli Defense Forces (IDF) kay nanghunaw dayon sa panghitabo nga matod pa ang ilang mga pwersa nagpabuto lamang og mga warning shot human ang mga Palestino nagpundok palibot sa mga trak nga nagdala sa ayuda tulo ka kilometro gikan sa Zikim crossing.
Dugang pa nga dili sila sigurado kung adunay napatay sa pagpamusil sa sa mga pwersang IDF.
Mirason nalang kini nga ang panagtapok kay daw hulga sa ilang mga militanteng personahe bisan paman walay armas nga gidala ang mga Palestinong nagkutoy sa kagutom hinungdan nga gipabuthan kini nila gikan sa gilay-on nga gatusan ka metros gikan sa distribution center.
Gipanghimakak gihapon sa Israel ang pagpahamtang sa mga pagbabag sa pagpasulod sa mga hinabang nga makasulod sa Gaza, sukwahi sa mga gikataho sa European Union ug sa United Nations.
Apan, sumala sa direktor sa al-Shifa Hospital sa Gaza City nga si Mohammed Abu Salmiya, ang ilang pasilidad nakadawat og 35 ka mga patayg lawas human sa insidente.
Gikumpirma niini sa ulahi nga 48 ka mga Palestinian ang nawad-an sa ilang kinabuhi.
Sumala sa datos sa ministeryo sa kahimsog sa Hamas, kapin sa 60,000 na ka mga Palestino ang napatay sa way puas nga pag-atake sa Israel sa Gaza sukad kaniadtong Oktubre 7, 2023, lakip ang kapin sa 18,000 ka mga batang gagmay ug kapin sa 9,000 ka mga babaye.
