CEBU CITY — Nakig-atubang si Governor Gwendolyn Garcia sa 37 ka mga beachgoers sa dakbayan sa Talisay kinsang gipangdakop niadtong Dominggo sa Pagkabanhaw kagahapon sa Cebu Provincial Capitol.
Matud ni Garcia iya nang gipasaylo ang nahisgutang mga indibidwal apan silotan gihapon sila tungod kay nakalapas kini sa giluwatan niyang kamanduan.
Nakalatid sa Exective Order 5-L-1 nga gidili ang pagpangaligo sa mga dagat ug uban pang bodies of water nunot na sa striktong pagpatuman sa enhanced community quarantine.
Nagkanayon ang provincial legal officer nga si Donato Villa Jr. nga mag-atubang ang mga nangaligo og kasong kalapasan sa Article 151 o Disobedience to Authority, nga maoy legal nga basehan sa Provincial Ordinance Number 2020-05.
Sumala pa sa tala gikan sa Talisay City PNP, moabot sa 41 ang nakalapas sa executive order diin nagagikan ang lima sa Dumlog, 13 sa Candulawan, 14 sa Tangke, ug lima sa Cansojong.
Samtang anaa sa city social welfare office ang upat ka mga menor de edad kinsang nalakip sa mga nakalapas.
Subay niini, gihimug-atan ni Cebu Provincial Police Office Director PCol Roderick Mariano nga dili sila mohunong sa pag-monitor sa mga malapason og wala’y silay palampason sa maong magmagahi sa ilang ulo.
Hangyo usab sa police official sa publiko nga mosunod sa kamandu-an sa gobyerno karong dili normal ang panahon gumikan sa coronavirus disease. (with reports by Bombo Joann Gantalao/gs/gn)
