Ipadayon sa Kagamhanan sa Dakbayan sa Sugbo ang pagpatuman sa 4-day workweek gumikan kay nakita sa kagamhanan nga adunay pagkunhod sa konsumo sa kuryente, tubig, ug krudo sa city hall.
Una nang nagpahigayon og pilot implementation ang kagamhanan sa dajbayan sa Sugbo sukad niadtong Abril 6 hangtud sa Abril 17, 2026 aron suwayan kong mapakunhod ang konsumo sa enerhiya ug ubang operational cost samtang gisiguro nga dili maapektohan ang mga batakang serbisyo sa publiko.
Gipahibalo ni Cebu City Mayor Nestor Archival nga ipadayon ang compressed four-day workweek alang sa tanang opisyal, empleyado, ug personnel sa gobiyerno sa siyudad hangtud sa Abril 30, 2026 subay sa giluwatan nga Memorandum No. HR-2026-042 niadtong Abril 20.
Nalatid sa maong memo nga ang oras sa trabaho magpadayon gikan alas 8:00 sa buntag hangtud alas 6:30 sa gabii matag Lunes hangtud sa Huwebes.
Kinahanglan usab nga matuman sa tanang empleyado ang minimum nga 40 ka oras matag semana nga trabaho nga walay labot ang lunch break.
Gitumbok usab nga mandatory ang paggamit sa biometrics o ubang pamaagi sa timekeeping lakip na ang pag-log sa oras sa udto gikan alas 12:00 hangtud sa alas 12:30 ug hugot nga gidili ang paghangyo og overtime pay o compensatory overtime credit sulod sa implementasyon sa maong setup.
Sa bahin sa energy conservation, gimandoan ang tanang personnel nga paandaron ang air conditioning units alas 9:00 sa buntag ug pagngon kini usa ka oras sa dili pa matapos ang trabaho o mga alas 5:30 sa hapon.
Tumong sa maong lakang ang pagmenus sa konsumo sa enerhiya ug gasto sa operasyon sa gobiyerno samtang gisiguro gihapon ang padayon nga paghatag og serbisyo ngadto sa katawhan.
