Patay ang upat ka sibilyan, lakip ang usa ka masuso nga duha pa lamang ka bulan ang edad, human giatake sa mga armadong grupo ang usa ka base militar sa habagatang bahin sa Colombia.
Kini ang gikumpirma ni Colombian President Abelardo de la Espriella niadtong Lunes, Nobyembre 2.
Nahitabo ang pag-atake niadtong Domingo sa gabii sa lungsod sa Planadas, lalawigan sa Tolima, Colombia.
Matod ni Planadas Mayor Juan Camilo Hueje, gipuntirya sa wala mailhing mga suspek ang base militar pinaagi sa paggamit og improbisadong rocket nga gihimo gikan sa mga tangke sa gas.
Dugang pa sa mayor, naapektuhan usab sa pag-atake ang usa ka ospital ug pipila ka mga balay nga nahimutang duol sa base militar.
Tungod niini, gimandoan niya nga gamiton ang usa ka lokal nga eskwelahan isip temporaryong pasilidad sa ospital.
Sa iyang bahin, nanumpa ang Colombian President nga gamiton ang tibuok kusog sa estado aron gub-on ang pundasyon niining mga kriminal nga grupo.
Sumala kang Colombian Human Rights Ombudswoman Iris Marín, dugay nang nag-atbang sa gobyerno ang mga rebeldeng grupo ug nag-ilog sa pagkontrolar sa maong lugar sukad pa niadtong 2022.
Bisan pa man nga gilaom nga makapamenos sa kapintasan sa nagkadaiyang rehiyon sa nasud ang kasabutan sa kalinaw tali sa gobyerno ug mga rebelde niadtong 2016, mibalik na usab ang pagsaka sa mga insidente sa kapintasan, ilabina human gilunsad ang kampanyang militar batok sa ilegal nga pagmina sa bulawan.
