Patay ang upat ka mga tawo human sa pagpamusil sa 14 ka tawo atol sa family gathering sa Stockton, northern California niadtong Sabado sa gabii (oras sa Amerika).
Kini ang taho sa San Joaquin County Sheriff’s Office diin matod pa ang pagpamusil nahitabo sa birthday party sa usa ka bata.
Saysay pa ni Stockton Vice Mayor Jason Lee sa usa ka Facebook post nga nakig-alayon na sila sa mga tigpatuman sa balaod aron matino ang hinungdan sa panghitabo.
Gikumpirmar sab sa mga kapulisan nga niresponde sila alarma human adunay 14 ka mga indibidwal ang gipamusil diin upat niini nakabsan gyud sa ilang kinabuhi.
Dugang pa nga adunay mga pasiunang indikasyon nga posibleng targeted incident kini apan wala nila buhii ang tanang posibilidad sa uban pang hinungdan sa pagpamusil sa wala pa mailhing suspek.
