Subay sa ikatulong sunod-sunod nga adlaw, ang National Grid Corporation of the Philippines (NGCP) gibutang sa Visayas grid ubos sa red alert status sa kagahapon Huwebes, Mayo 14, gikan sa alas 4:00 sa hapon hangtod alas 9:00 sa gabii.
Matod pa, ang red alert nagpasabot nga ang suplay dili na igo aron matubag ang panginahanglan.
Diin, mahimong mahitabo ang power interruption kung dili madumala ang panginahanglan hinungdan nga nakasinati og black-out ang pipila ka lugar sa Dakbayan sa Sugbo kagahapong adlawa.
Ingun man nga ang pagsaka sa panginahanglan sa kuryente tungod sa mas init nga panahon, samtang daghang mga planta sa kuryente ang napugos nga ma-outage, misangpot sa hugot nga suplay sa kuryente sa tibuok Visayas grid.
Kahinomdoman nga sugod alas 9:00 sa gabii niadtong Miyerkules, Mayo 13, 2026, ang NGCP miingon nga ang Visayas Grid gibutang ubos sa Red ug Yellow Alert status tungod sa hugot nga kondisyon sa suplay sa kuryente.
Diin ang Red Alert gipatuman gikan alas 5:00 sa hapon hangtod alas 10:00 sa gabii, nga nagpakita nga ang generating capacity dili igo aron matubag ang panginahanglan sa mga konsumidor ug ang kinahanglanon sa pag-regulate sa transmission grid.
Gisundan kini sa Yellow Alert gikan alas 10:00 sa gabii hangtod alas 12:00 sa tungang gabii, nga nagpakita nga ang operating margin nagpabilin nga dili igo aron matubag ang kinahanglanon sa contingency sa grid.
