Nameligro nga masuspenso ang dul-an sa 40 ka power plants tungod sa ilang kawalay aksyon taliwala sa padayon nga kakulangon sa suplay sa kuryente sa Visayas, sumala ni Energy Secretary Sharon Garin.
Kahinumduman nga ang Department of Energy (DOE) nag-isyu og 203 ka show-cause orders sa mga power generation companies sa tibuok nasud niadtong Hulyo tungod sa ilang kapakyasan sa pagsumiter sa mandatory self-assessment reports.
Tumong niini nga mamonitor ang kahimtang ug kapasidad sa mga planta, lakip ang mga insidente sa pagkawala sa kuryente.
Matod ni Garin, naghatag na og mga pasidaan ang DOE ug anaa sa proseso sa pagrekomendar og suspensyon sa mga kompanya ngadto sa Energy Regulatory Commission (ERC).
Wala niya nganli ang mga operator nga posibleng masuspenso, apan gikataho nga naglakip kini sa gagmay nga diesel power plants.
Dugay nang nakasinati og kakulangon sa suplay sa kuryente ang Visayas, nga kanunayng gipailalom sa yellow alert ug usahay red alert kung dili igo ang suplay aron matubag ang panginahanglan.
