Nagmalinawon ang nahitabong lihok-protesta sa nagkadaiyang grupo sa Sugbo atol sa pagtimaan niini sa ika-40 nga anibersaryo sa EDSA People Power Revolution kagahapong adlawa sa Miyerkules, Pebrero 25, 2026.
Ang kalihokan kay gipangulohan sa Archdiocese of Cebu ug sa civic group nga Sugboanong Pakigbisog Kontra Korapsyon (SuPaKK) diin gisalmotan kini sa nagkadaiyang mga pundok sa sektor sa simbahan, mga tunghaan, kabatan-onan ug uban pa.
Sa mga nahitabong kalihukan nga ilang gipasiugdahan, nakita ang kadasig sa mga misalmot diin nagdala pa kini sila og mga paraphernalia sama sa mga flaglets ug banners sa pagpadayag sa sugyot sa grupo nga ang paghandom sa EDSA kay ang pagpaningil sa katawhan og kaayuhan gikan sa kagamhanan.
Unang nagpahigayon og santos nga misa sa Basilican Minore del Santo Niño de Cebu dayon sa simultaneous bell-ringing pagtakna alas-3 sa hapon nga gisundan sa martsa padulong Plaza Independencia sa pagbuhi sa kasaysayan niadtong 1986 diin minilyon sa mga Pilipino ang nagtapok sa EDSA dala dili ang armas apan ang paglaum ug rosaryohan sa pagpili sa pag-ampo nga sulbad sa kaniob nga dala sa diktadoryang Marcos Sr.
Sa iyang bahin, nagpadayag sa iyang pasalamat si Archbishop Alberto “Abet” Uy sa tanang mitambong sa kalihukan dinhi sa Sugbo sa paghinumduman sa kamahinungdanon sa EDSA dili lamang sa kasaysayan lakip na sa moralidad sa katawhan nga saksi ang tibuok kalibutan sa bloodless revolution nga gipasiugdahan sa atong mga katiguwangan.
Pipila sa mga singgit ug panawagan sa lihok-protesta kagahapong adlawa kay mao ang pagpanngil og hustisya sa mga gidaog-daog ug ang transparensya sa panudlanan sa katawhan ilabi na nga wala pay nasilotan sa anomaliya sa flood control projects sa gitaganang trinilyong ka pesos nga nausik tungod sa kurapsyon.
