CENTRAL VISAYAS-Mokabat sa 41 ka barangay sa Central Visayas ang gitala isip ‘areas of concern’ subay sa nagsingabot nga Barangay ug Sangguniang Kabataan (BSKE) 2023 elections.
Mao kini ang gibutyag ni Police Lieutenant Colonel Gerard Ace Pelare, nga mao ang tigpamaba sa regional director sa Police Regional Office sa Central Visayas kagahapong adlawa, Oktubre 13, 2023.
Hinungdan nga pahugtan sa mga sakop sa kapulisan ang pag-monitor sa maong mga dapit sa luwas ug malinawon nga piniliay karung umaabot nga Oktubre 30.
Sa 41 ka mga dapit, 35 niini ang gipaubos sa ‘areas of immediate concern’ nga sagad nga nahimutang sa Negros Oriental.
Sa pikas bahin, 6 ka mga dapit ang gipaubos sa ‘areas of control’ nga nahimutang sa lalawigan sa Sugbo, Bohol, ug Negros Oriental.
Gitino usab sa tigpamaba sa Regional Director sa PRO-7 nga ang naasoy nga lista sa mga dapit nga gi-klasipikar ubos sa ‘areas of immediate concern’ ug ‘areas of control’ mamahimong giya sa kapulisan alang sa ilahang deployment strategies.
Apan bisan pa man sa pagpakatap og mas daghang pwersa sa kapulisan sa mga dapit nga gipaubos sa ‘areas of concern,’ wala kini nagpasabot nga mas huyang ang seguridad sa mga dapit nga wala nalakip sa maong lista.
Gihimug-atan niini nga ang pagpakatap og mga sakop sa kapulisan mag-depende sa ‘peculiarity’ sa lugar, kung diin ang mga city ug provincial director adunay pagahimoon nga mga security measures base sa threat assessment sa usa ka lugar.
