Milagrosong nabuhi ang usa ka 43-anyos nga guwardiya human natanggong sulod sa walo ka adlaw ilalom sa nahugno nga building tungod sa sunod-sunod nga linog nga miigo sa Venezuela.
Nailhan kini nga si Hernán Alberto Gil Flores, kinsa nagtrabaho isip night watch guard sa usa ka pito ka andana nga shopping center.
Nagpabilin siyang luwas sulod sa iyang security booth sa building. Diin ang iyang cabin igo nga lig-on aron makahimo og “air pocket” o air space sa tunga sa nahugno nga istruktura.
Nahitabo ang insidente sa siyudad sa Catia La Mar sa estado sa La Guaira, usa sa mga rehiyon nga labing naapektuhan sa linog.
Ang mga bombero ug mga rescue worker migugol og kapin sa 100 ka oras sa pagkalot kang Gil gikan sa 140 ka tonelada nga nahugno nga konkreto.
Kahinumduman nga niadtong Hunyo 24, 2026, ang amihanang baybayon sa nasud giuyog sa sunod-sunod nga kusog nga linog nga may sukod nga 7.2 ug 7.5 sa Richter scale.
Hangtod sa Huwebes sa gabii, ang ihap sa mga namatay miabot na sa 2,595 ug liboan pa ang nawala. Mao nga ang pagkaayo ni Gil human sa dugay nga panahon giisip nga usa ka dakong milagro ug simbolo sa paglaum.
