Labing menos 44 ka indibidwal ang namatay human nalunod ang usa ka overloaded ferry sa Lake Kariba sa Zimbabwe.
Matod sa Civil Protection Unit ang ferry nagdala og 114 ka adult passengers, lima ka crew member ug wala mailhi nga gidaghanon sa mga bata sa dihang nahitabo ang insidente, diin gikanayon nga ang maong ferry giingon nga adunay kapasidad nga 90 ka pasahero.
Subay niini, ang mga awtoridad sa sinugdanan nagtaho nga 77 ka tawo ang naluwas ug 15 ka mga patayng lawas ang nakit-an. Apan, ang Zimbabwe Republic Police sa ulahi nagpataas sa ihap sa mga namatay ngadto sa 44 samtang nagpadayon ang search and rescue operation.
Gikataho usab nga adunay usa ka saksi ang nag-ingon nga ang ferry naglawig sa dili maayo nga panahon ug posible nga naigo sa kusog nga mga balud nga hinungdan sa pagkalunod niini, ug miingon nga aduna pay daghang mga patayng lawas ang nakita sa tubig samtang nagpadayon ang rescue operation.
Sa karon, ang mga naluwas nga pasahero gidala sa Long Island, usa ka lugar nga nahimutang sa tunga sa Lake Kariba. Samtang duha ka punerarya ang gitahasan usab sa pagkolekta sa mga nakit-ang patayng lawas samtang nagpadayon ang pagpangita sa mga missing.
