CEBU CITY — Giimbestigaran karon sa PNP ang giingong kagubot sa sulod sa Operation Second Chance, sa Brgy. Kalunasan, Cebu City, diin miresulta kini sa pag-ikyas sa lima ka mga minor offenders kagabii.
Matud ni Police Captain Janelito Marquez, ang hepe sa Guadalupe Police Station, nga giplanohan sa mga menor de edad ang maong pag-ikyas kung diin nagpakaaron ingon sila.
Base sa inisyal nga imbestigasyon, nagpaka-aron-ingon ang mga menor nga mangayo og ininit nga tubig ngadto sa ilang house parents.
Human nga mihatag og ininit nga tubig, ilang gidasmag ang house parent ug nakahigayon sila sa paggawas sa pasilidad.
Moabot sa lima ka mga “children in conflict with the law” ang miikyas apan duha ang nadakpan human mipahigayon og hot pursuit operation ang kapulisan.
Wala pa usab matino ni Marquez kung nganong niikyas ang duha ka mga menor de edad kagabii.
Gipangita na karon sa kapulisan ang tulo ka mga CICLs human sa maong insidente.
Mihangyo si Marquez sa ginikanan sa mga miikyas nga menor nga ipasurender dayon sa buhatan sa kapulisan o mismong sa buhatan sa Operation Second Chance.
Subayon pa usab sa hingtungdan kung aduna bay nahitabong maltreatment sa sulod sanglit nakita sa hepe sa Guadalupe PNP nga maayo ang pagtratar ngadto sa minor offenders.
