MANDAUE CITY, CEBU- Nagtingkagol na karon sa prisohan ang lima ka mga lalaki human kini gipang-sita ug gidakop sa mga kapulisan sa gawas sa hospital room sa hit-and-run suspect nga si Sean Andrew Pajarillo sa Chong Hua Hospital Mandaue, kagahapon sa hapon, Pebrero 12, 2026.
Sumala sa report, pasado alas-2:49 sa hapon sa dihang namatikdan ni PCpl Dandean Dequinto sa CCPO ang lima ka mga tag-as og barog ug dako og lawas nga mga lalaki nga misulod sa hospital premises.
Pagpangutana sa otoridad, nagpaila ang maong mga lalaki nga sila ang nagsilbing “private security escorts” ni Pajarillo, ang suspetsado sa kontrobersyal nga hit-and-run incident niadtong Pebrero 8 nga nikalas sa kinabuhi sa batan-ong negosyante nga si Kingston Ralph Cheng.
Tungod sa kadudahang lihok, daling nakig-coordinate si PCOL George Ylanan sa Mandaue City Police Office (MCPO) ug sa Task Force HUSAY (gilangkuban sa RCSU7, IMEG7, ug RPSPU7).
Sa gihimong validation, nasuta nga ang lima ka mga dinakpan, nga giilang sila Alyas “Mar,” “Arko,” “Zar,” “Choy,” ug “Yayan”, mga bouncer sa iladong disco bars sa dakbayan ug walay gihuptang bisan unsang lisensya o dokumento sa pagka-security guard.
Tungod sa pagpahigayon og security services nga walay pagtugot gikan sa gobyerno, gidakop ang lima sa mga arresting officers nga sila PCMS Jasper Van Sumugoy (RCSU7) ug PSMS Francis Hirod Babor (PS2, MCPO).
Giatubang karon sa mga dinakpan ang kasong paglapas sa Republic Act 11917 o ang Private Security Services Industry Act, partikular na ang Engaging in the Exercise of Security Profession without Authority.
Sa pagkakaron, anaa na sa kustodiya sa Mandaue City Police Office Station 2 ang mga dinakpan alang sa saktong disposisyon ug pagpasaka og tukmang kaso.
