CEBU – Moabot sa 566 ka mga balay ang naugdaw sa sunog nga miigo sa lima ka sityo sa Barangay Punta Princesa, Dakbayan sa Sugbo Sabado sa gabii, Hunyo 11, 2022.
Sa inisyal nga imbestigasyon, nagsugod sa mga sityo sa Tuburan ug Arca ang sunog.
Naabot ang kalayo sa laing tulo ka mga sityo sa Trinidad, Merco, ug Enriquez.
Gibana-banang moabot sa P16.5 milyones ang danyos sa sunog.
Giingong gituyo ang maong sunog apan ang indibidwal nga napasanginlan nihimakak sa pasangil sa iyang silingan nga siya ang nakaingon sa sunog.
Gikustodiya sa kapulisan si Marilou Alpeche, 38 anyos, nga molopyo sa Sityo Tuburan sa maong barangay.
Samtang gikompirmar sa tigpamaba sa Cebu City Fire Office nga si SFO2 Wendell Villanueva adunay usa ka tawo nga nakalas human mapaig sa miulbong sunog.
