CENTRAL VISAYAS- Nadakpan ang 16 ka mga wanted person sa sunod-sunod nga manhunt operations nga gihimo sa kapulisan sa Central Visayas niadtong Abril 2, 2026.
Kabahin kini sa gipakusgan nga kampanya batok sa mga pugante sa tibuok rehiyon.
Sa kinatibuk-an, lima (5) sa mga nadakpan ang nalista isip Most Wanted Persons, samtang onse (11) ang giklasipikar isip Other Wanted Persons.
Gipasiugdahan ang operasyon sa pagkadakop sa usa ka Top 4 Regional Most Wanted Person nga nag-atubang og kasong murder, nga walay girekomendar nga piyansa.
Matod sa Police Regional Office 7, kabahin kini sa padayon nga paningkamot sa kapulisan sa pagpangita ug pagdakop sa mga indibidwal nga adunay standing warrants of arrest, ilabina kadtong nalambigit sa seryosong mga krimen nga naghulga sa kaluwasan sa publiko.
Gipasiugda ni PBGen. Redrico A. Maranan, Regional Director sa PRO7, nga magpabilin nga walay hunong ang paggukod sa mga pugante isip kabahin sa pasalig sa pulisya sa pagpanalipod sa komunidad ug pagsiguro nga ang hustisya mahatag.
Dugang pa ni Maranan, magpadayon ang ilang operasyon batok sa mga naglikay sa balaod.
