Naangol tulo ka mga pahinante ug tindera sa usa ka tindahan lakip na ang driver sa maong truck, nga adunay kargang scrap materials human kini midaro sa tulo ka mga tindahan sa Barangay Maghaway, Dakbayan sa Talisay pasado alas 2 sa hapon karong adlawa. Mayo 17, 2026.
Gikataho nga lakip sa gidaro sa truck ang usa ka tindahan, bakery ug water refiling station sa naasoyng lugar.
Matud pa ni City of Talisay – Traffic Operations and Development Authority Head Jonathan “Joy” Tumulak sa eksklusibong pakighinabi sa Bombo Radyo Cebu News Team, gikataho nga ang driver nakatulog sa iyang pagmaneho samtang naglatas sa Maghaway Road gikan sa ibabaw nga bahin samtang nga adunay karga nga scrap materials diin iya nalang namat-an nga iya nang nadaro ang usa ka tindahan, og pipila ka mga establisyemento niini.
Gikompirmar usab ni Tumulak nga walay nakalas sa maong insidente ug padayon ang paghatag ug atensyon medikal sa mga naangol
Pahimangno ni Tumulak labi na sa mga drivers nga kung nakabati og pagduka mas maayo nga magpahuway sa daplin sa dalan aron makalikay sa disgrasya
Hinuon luwas ra ang mga naangol sa maong panghitabo.
