BOHOL – Patay ang lima ka mga gituhuang miyembro sa New People’s Army (NPA) sa nahitabong engkwentro sa mga sakop sa 47th Infantry Batallion sa Sitio Langob, Brgy. Cabacnitan, lungsod sa Bilar Bohol.
Sa pakighinabi sa Bombo Radyo Cebu kang 47th Infantry Batallion Civil Military Operations Officer, Army Lieutenant Grace Remonde, gibutyag niini nga igo lang nga nagpatrolya ang tropa sa gobyerno kabahin sa naunang report nga aduna matod pa’y mga armadong grupo sa dapit.
Segon kang Remonde, nahitabo ang engkwentro pasado alas singko ganinang buntag diin usa sa tropa sa gobyerno ang gikatahong nasamdan samtang lima sa mga gituhu-ang rebelde ang namatay ug unom ang padayon nga gipangita sa otoridad.
Nakuha sa mga sundawo ang mga gamit lakip na ang mga armas nga gikan sa mga gituhuang rebelde, ug anaa na ningkasamtangan sa kustudiya sa Bilar, Bohol.
Samtang gihatagan na ug pasiunang tabang sa pangagamhanan sa Bilar, Bohol ang anaa sa kapin 40 ka pamilya nga apektado sa maong engkwentro. | JG | GS |
