CEBU CITY– Muabot sa 6-M ang kantidad sa gitoohang shabu nga nasakmit gikan sa babae nga pusher ug sa 3 pa nga kauban niini sa gipahigayong buy bust operation sa PDEA-7 sa Brgy. Bulacao, Cebu City . Giila ang babae nga si Luz Canlubo 48 anyos ug ang iyang mga kauban nga sila Rey Naval,John Rey Suello, ug Pepito Joson.
Samtang naka-ikyas ang asawa sa babae nga pusher nga usa usab sa target nga giila nga si Christopher Canlubo ,46 anyos ug giingong igsoon sa usa ka pulis sa Cebu Provincial Police Office.
Matud ni Earl Rallos ang acting PIO sa PDEA-7, nga gi-surveillance nila ang subject sulod sa 3 buwan ug sa dihang na-confirm kini dali sila nga nagpahigayon og buybust operation.
Gawas sa 6 million pesos nga kantidad sa gitoohang shabu nakuha usab gikan sa mga nasikop ang mga drug paraphernalia.
Sa karon padayon pa nga gipangita ang lalaki nga naka-ikyas sa nahisgutang operasyon ug nakadetain na ang 3 ka mga nasikop sa PDEA-7 detention cell. Nakatakda kining pasakaan ug kaso nga may kalapasan sa pagamit ug pagpayuhot og iligal nga drogas.
