Kumpirmadong anaa na sa pito ka tawo ang namatay samtang 82 ang wala pa mailhi human sa dakong pagdahili sa yuta nga miigo sa Pasirlangu village, West Bandung, West Java, Indonesia.
Nahitabo ang insidente human nahugno ang bahin sa Mount Burangrang tungod sa kusog nga ulan.
Kapin sa 30 ka mga balay ang natabunan sa lapok ug mga debris, nga hinungdan sa dakong kadaot sa komunidad.
Nanguna ang National Disaster Mitigation Agency (BNPB) sa mga operasyon sa pagpangita ug pagluwas, kauban ang Armed Forces of Indonesia, mga lokal nga gobyerno, ug mga boluntaryo.
Nabalda ang operasyon tungod sa padayon nga pag-ulan ug sa hulga sa dugang nga pagdahili sa yuta sa lugar.
Gawas sa pagdahili sa yuta, 20 sa 30 ka mga sub-district sa Karawang ug mga bahin sa East Jakarta ang gibahaan usab, nga nagpugos sa gatusan ka mga residente sa pagbakwit.
Sumala sa gobyerno, ang pagkaguba sa kalasangan ug pagkadaot sa kalikopan nagdugang sa risgo sa katalagman, mao nga gisang-at ang mga kaso batok sa unom ka mga kompanya nga giingong responsable sa pagkadaot sa kalikopan.
