CEBU CITY – Gibana-bana nga mukabat sa 75 kaadlaw o duha ka buwan, una sila makahatag ug desisyon sa giduso nga petisyon alang pag-usbaw sa minimum nga suholan.
Gibutyag ni RTWPB-7 Acting Board Secretary Atty. Evita Mendoza-Balane, nga ang maong mga adlaw kay gilangkoban na sa pagsuta sa ‘validity’ sa petisyon, pagpahigayon ug mga public hearings, ingon man ang pipila nila ka mga panagpulong.
Matud pa, upat ka mga ‘wage hike petitions’ ang gi-file sa opisina sa RTWPB-7, ug usa na niini ang Trade Union Congress of the Philippines (TUCP), diin naghangyo ug P834 nga minimum nga suholan.
Kahinumdoman nga una nang gimandoan ang Regional Tripartite Wages and Productivity Boards (RTWPBs) sa nasud nga musumitir sa ilahang mga rekomendasyon sa buwan sa Abril.
