Labing menos walo ka tawo ang namatay tungod sa kusog nga uwan nga dala sa shear line sa Davao Region, sumala sa Office of Civil Defense (OCD).
Sa usa ka interbyu, si OCD Region XI Director Ednar Dayanghirang miingon nga upat sa mga namatay gikan sa Davao de Oro, samtang ang uban natala sa Davao Oriental. Ang tanan nga namatay tungod sa pagdahili sa yuta human sa kusog nga uwan.
Niining bahina, gibanabana nga hapit 20,000 ka pamilya ang naapektuhan sa dili maayong panahon sa Davao de Oro lamang ug ang kadaot sa agrikultura sa probinsya miabot sa P376-milyones.
Gipasiugda ni Dayanghirang ang panginahanglan nga ayohon ang sistema sa drainage sa mga dagkong dalan aron malikayan ang pagbaha. Miingon siya nga ang mga drainage sa nasudnong dalan dili maayo ug dili kompleto mao nga ang tubig nga nagdagayday gikan sa kabukiran walay hustong agianan.
