Gipasiugda sa kampo ni kanhi House Speaker Ferdinand Martin Romualdez nga ang 90 ka adlaw nga preventive suspension nga gipahamtang batok kaniya may kalabotan sa kasong plunder, wala nagpasabot nga napamatud-an na ang iyang pagkasala.
Matod ni Atty. Ade Fajardo, ang abogado ni Romualdez, giklaro mismo sa Sandiganbayan nga ang giingong pagkalambigit niini sa plunder—partikular na ang pagdawat og mga kickback o komisyon—kinahanglan pa nga pamatud-an atol sa pagdungog sa kaso.
Gipahayag ni Fajardo nga ang resolusyon sa korte nga may petsang Nobyembre 10 naghisgot lamang mahitungod sa pormal nga sumbong (charge sheet) ug sa mandatory nga pagpatuman sa preventive suspension sumala sa gikinahanglan sa balaod.
“The court has not found Martin guilty of plunder. It has not established that he received a single peso in illegal commissions or kickbacks,” matod ni Atty. Fajardo.
Dugang pa niya nga wala nagpagawas ang korte og bisan unsang desisyon nga nagdeklarar kang Romualdez nga sad-an, o nagkumpirma nga nakadawat siya og bisan unsang ilegal nga komisyon.
Bisan pa man nga ang kanhi Speaker kasamtangang detinado ug dili na makagamit sa mga gahom nga nalambigit sa iyang katungdanan, gipahayag sa depensa nga ilang gitahod ang desisyon sa korte ug kasamtangan nilang gitimbang-timbang ang posibleng mga lakang nga legal nga mahimo nilang buhaton.
Gipasiugda ni Fajardo nga ang responsibilidad sa pagpamatuod sa mga pasangil batok kang Romualdez nagpabilin diha sa habig sa prosekusyon.
“Hindi hatol ng pagkakasala ang suspension. Mismong korte ang nagsabing kailangan pang patunayan ang mga paratang. Hindi sapat ang akusasyon—kailangan ng ebidensya,” matod ni Atty. Fajardo.
