CEBU CITY – Nagkagutay-gutay ang lawas sa usa ka lalaki human kini mabuthan sa usa ka riffle grenade launcher sa barangay Tisa dakbayan sa Sugbo.
Ang biktima giila nga si Ruben Genteroni nga nagpuyo sa Sitio Katambisan sa maong barangay.
Matud ni SPO1 Alex Dacua sa homicide section sa Cebu City Police Office (CCPO) gikan nga nagpagawas sa iyang hugaw sa may kasagbutan sa dihang nakita niini ang usa ka granada.
Dali kini nga gipunit sa biktima ug plano unta niini nga i-report sa barangay apan samtang naglakaw kini sa dalan giingong gikuri-kuri sa biktima ang maong granada ug natangtang ang safety pin niini hinungdan nga mibuti kini sa iya mismo nga lawas.
Nakugang nalang ang mga silingan niini sa dihang nakabati sila og buto ug nakita nila ang lawas sa lalaki nga nagkagutay-gutay.
Giingon ni Dacua nga naa sa 1980s ang nahisgutang granada ug posible nga nabahilin kini sa moang lugar gumikan kay didto nagka-engkwentro ang mga rebelde ug militar sa una.//
