(Update) CEBU CITY – Gi-umol na sa Philippine Coast Guard (PCG) – Cebu Station ang investigation team nga maoy mututok sa imbestigasyon sa nahitabong insidente sa taliwa sa M/V Saint Braquiel fast craft ug SMCA barge.
Sa pakighinabi sa Bombo Radyo Cebu ni PCG-Cebu Station Commander Dionnellete Ampil giingon niya nga gihuwat nalang nila ang marine protest sa dili pa sila muluwat og pamahayag kung nagkabangga ba gyud ang duha ka vessel o usa niini ang mibangga.
Matud ni Ampil nga naa sa 90 pasahero ang sakay sa fast craft nga adunay 12 ka mga crew.
Sa nahisgutang ihap sa mga pasahero, 58 niini ang dali nga gidala sa tambalanan ug 23 ang na-admit.
Samtang 4 ang severely injured lakip na ang kapitan sa fast craft nga si Capt. Reniero Maurin.
Samtang wala man hinoon nasamdan sa mga crew sa barge.
Nasayran nga gitoohang ang nahisgutang barge adunay karga nga empty bottles gikan sa Estancia, Iloilo sa usa ka tugboat nga gidala ni Capt. Edgardo Binolirao nga mudunggo unta sa Ouano wharf sa lungsod sa Mandaue, Cebu.
Samtang gibutyag usab sa tag-iya sa 2Go shipping lines nga ilang abagahon ang gastos sa mga biktima nga naa karon sa tambalanan.
Mahinumduman nga alas-10:15 kagabii sa dihang nahitabo ang insidente sa kadagatan sa may Mactan channel ilawom sa Mandaue-Mactan bridge, 10 minutos sa wala pa midunggo ang fast craft sa pier 1 sa Cebu.
