CEBU CITY – Walay special treatment. Kini ang giklaro ni Police Regional Office 7 Regional Director Police C/Supt Noli Taliño sa dihang misurindir si David Chua Lim,. Jr. sa iyahang opisina pasado alas 2 kaganihang kaadlawon.
Sa usa ka press conference, gibutyag ni Taliño nga gihatagan lang nila og seguridad si Lim nga gikinahanglan sa pagsurindir niini.
Matud pa ni Taliño nga basi sa inahan ni Lim nga nahadlok usab ang suspek sa iyahang seguridad hayan gibantayan kini og mga miyembro sa Special Action Force.
Kaganihang buntag gipaubos na sa booking si Lim ug gikuhaan na og mug shots ug gikatakdang pasakaan og kasong frustrated homicide ug illegal possession of firearm.
Samtang wala usab muhatag og statement si Lim may kalabot na sa nahitabong road rage.
Sa pagkakarun, magpabilin una sa Regional Intelligence Division sa PRO 7 samtang dili pa kini ipresentar sa preliminary investigation sa Cebu City Prosecutor’s Office.
Giawhag usab ang babaye nga makita sa video nga kauban ni Lim nga mupatim-aw sa PRO 7 gumikan kay gilantaw usab ang posiblidad sa pagpasaka og kaso batok niini.
Sa habig usab sa kampo ni Lim, gipadayag sa abogado sa suspek nga si Atty Orlando Salatandre nga walay intensyon nga mupatay ang iyahang kliyente basi sa igo sa biktima ug sa nakuha sa video.
Matud pa ni Atty Salatandre nga andam sila nga atubangon ang kaso arun nga mugawas ang kamatuoran.
Giklaro usab sa maong abogado nga abli ang ilahang kampo sa usa ka settlement.
