Cebu City- Patay ang Abu Sayyaf member nga si Saad Samad Karim human kini mapusilan sa mga kapulisan human misulay sa pag-ikyas sa mga police escort niini didto sa lungsod sa Cortes sa Probinsya sa Bohol.
Matud ni PRO-7 Director Police Chief Supt. Noli Taliño nga apsados alas dos ganihang kaadlawn sa dihang gi byahe si Karim paingon na sa BJMP District jail nga nahimutang sa lungsod sa Cortez diin kini temporaryo nga e detain. Dugang ni Taliño nga nag sige na ug reklamo sa kasakit sa iyang tyan ug kalibangon na ang maong Abu Sayyaf member hinungdan nga mihunong ang ilang gisakyan aron nga makalibang kini sanglit matud pa nga layo pa ang BJMP.
Gikuhaan pa kini ug posas aron makalibang og tarong apan gigamit niini ang kahigayunan aron sa pag ikyas. Milanat pa og duha ka oras ang pagpangita sa mga kapulisan kang Karim. Sa dihang naabtan kini sa kapulisan, matud pa nga giilog ni Karim ang armas sa usa sa iyang mga escort apan naunhan na kini og pusil sa kauban sa pulis.
Nakaangkon og samad pinusilan sa ulo, dughan ug tiil si Karim nga maoy hinugdan sa iyang kamatayon. Gidali pa kini pagdala sa duol nga tambalanan apan gi deklara kining dead on arrival.
