Cebu City-Mitabang na ang mga pipila ka mga estudyante ug professionals sa Sugbo aron nga ma rescue ang mga residente nga napiit sa opensiba sa militar batok sa teroristang Maute group pinaagi sa pagcontact sa mga kaila niini sa Marawi sa pagsayod sa ilang sitwasyon. Subay niini miumol sila ug kawsa , ang “Tabang Sibilyan Visayas” diin nanawagan sila ug mga tawo nga mo volunteer aron kontakon ang mga kaila niini nga na stranded gumikan sa engkwentro.
Matud ni Jamil Faisal Saro Adiong usa ka Maranao ug head volunteer sa maong grupo nga aduna silay gihimo nga database diin nila madawat ang tanan nga mga impormasyon nga makuha nila sa mga tawo ug ipadangat nila kini sa lokal nga kagamhanan sa Autonomous Region of Muslim Mindanao diin mapadangat kining maong impormasyon sa AFP alang na posibleng pag rescue kanila. Matud pa ni Adiong nga aduna silay nadawat nga mga mensahe gikan sa mga tawo nga nangayo ug tabang nga ma rescue.Subay niini nanawagan si Adiong nga kung mahimo ihunong una ang mga airstrike sa AFP sanglit anaa matud pay mga sibilyan nga madamay.
Gidugang pa niini nga adunay mga senior citizens ang nagdumili sa pagbiya sa ilang panimalay.Naa usab mga bata nga naa gihapon sulod sa mga panimalay. Nanawagan usab kini ug tabang sama sa tubig,pagkaon nga “jalal” sanglit kadaghanan sa mga nibakwit mga muslim.Lakip nga tabang nga ilang gikinahanglan mao ang hygiene kit ug mga sinina. Paghangyo ni Adiong nga unta magkahiusa ang tanan ug dili isipon kung si kinsa ang mga tawo,unsa ang ilang mga relihiyon aron nga motabang sanglit kitang tanan mga Pilipino.
Samtang , sa pagkakaron adunay pagsuporta si Adiong sa pagdeklara ni presidente Rodrigo Duterte sa Mindanao kung kini ang dinaliang pamaagi alang sa kaluwasan sa mga tawo apan miawhag kini sa mga tawo nga magpabiling magbinantayon sa posibleng pagtumaw sa mga pagpang-abuso
