Cebu City-Wala gihapoy makit-ang tima-ilhan ang retrieval operations team nga anaa didto sa bung-aw nga dagat sa Caubian ug Olanggo island , dakbayan sa Lapu-lapu ang lawas ni Bien Unido Mayor Gisela Boniel.
Matud ni Lapulapu City Director Police Sr. Supt. Romel Cabagnot nga ikaupat nga adlaw na silang nagpangita sa bahin sa dagat kung diin gituohang gilabay ang lawas ni Mayor Gisela human kini gipusil sa bana nga si Board member Nino Rey Boniel. Bisan paman niini wala gihapon mawad-i ug paglaom ang grupo nga makit-an ang lawas ni Mayor Gisela.
Dugang pa ni Cabagnot ang nakaapekto sa ilang operasyon kay ang kuwang sa gamit kung diin kasagaran sa ilang mga gamit kay hinuwaman lamang nila sa mga tag-iya sa Fishing vessel sa maong lugar. Wala usab kini saktong budget para sa nahisgutang operasyon mao nga iya-iya nalang ang mga volunteer divers sa pagdala sa ilang mga makaun ug magamit.
Subay niini mihangyo si Cabagnot sa Munisipalidad sa Bien Unido sa Bohol nga kung mahimo nga magpadala sila ug mga divers nga mutabang sa pagpangita sa lawas sa gipatayng mayor. Gihimug-atan usab ni Cabagnot nga mas mapaspasan pa unta ang ilang operasyon kung kompleto sila sa ilang gamit ug daghang divers nga mutabang sa pagpangita.
Nasayran nga kasamtangang gisuspende ganinang alas 2 sa hapon ang gihimong retrieval operations ug ipadayun kini alas 6 sa buntag ugma.
