Cebu City-Ma-ampingon ang AFP sa pagpahigayon sa ilang operasyon sa upat ka mga Barangay sa Marawi City batok sa mga Maute terror Group.
Gibutyag ni AFP Spokesperson Brig. General Restituto Padilla nga duna pay gibanabanang 100 ka mga Maute members ang anaa sa lugar og dunay dalang mga hostages nga mga sibilyan. Gibutyag niini nga ilang giestudyuhan pag-ayo ang ilang mga lakang aron masiguro nga walay sibilyan nga madamay sa operasyon batok sa teroristang grupo.
Dakong hagit usab matud pa ang lugar nga gikahimutangan sa mga teroristang grupo diin kasibasado kaayo nila ang terrain sa lugar. Giangkon usab sa tigpamaba sa mga kasundaluhan nga anaa sa maayo nga pwesto ang ilang kontra maong maglisud sila kung asa gayud nagpahipi ang mga teroristang grupo. Giklaro usab ni Padilla nga walay reinforcement ang Maute Group sa Marawi. Suma sa opisyal nga imposible nga dunay musukol aron sa pag reinforce sa teroristang grupo sanglit naka lock-down na kini sukad nga nitumaw ang kagubot sa maong dapit. Gisiguro usab niini nga hugot ang pagbantay sa entry ug exit points sa Marawi City ug Lanao del Sur.
Samtang ,padayon usab ang gihimong beripikasyon sa mga otoridad kalabot sa report nga napatay na ang tulo ka magsuong Maute nga sila si Omar, Abdullah ug Maide. Gibutyag ni Padilla nga ilang gitinguhaan nga makakuha ug impormasyon sa inahan sa Maute Brothers nga si Farhana Maute apan giingong ila lamang kining makumpirma kung makakita sila ug lig-ong pruweba nga napatay na ang mga anak niini.
