CEBU CITY-Gipasiguro ni Sen. Win Gatchalian ang chairman sa Senate Committee on Energy nga padayon nila nga monitoron ang pagpaayo sa Geothermal Power Plant sa Leyte para hingpit na nga mabalik ang kuryente sa Rehiyon 8 hasta na usab sa Rehiyon 7.
Kini human nga gitay-og sa 6.5 magnitude nga lindog ang leyte kung diin nadaot ang geothermal power sa Ormoc nga maoy nagsupply sa kuryente sa tibook Leyte hasta na sa Cebu.
Matud ni Gatchalian nga ang solusyon nga ilang himoon karon mao ang pagtabang sa mga kooperatiba nga makabangon dayon. Sigon sa senador nga daghan nga mga transformers ug makina ang naguba ug mao kini ang ilang ayuhon.
Gi-angkon usab sa Senador nga kini ang pinakadako nga problema sanglit sumpay-sumpay ang kuryente sa Leyte ug mismong ang geothermal power plant pa gayud ang nadaot.
Hinoon nasayran nga nagpadala na sila og additional diesel power plant sa rehiyon 7 ug nagpadala na usab og mga generator ang Department of Energy (DOE) para magamit.Gitino ni Gatchalian nga kini ang pinakadali nga programa nga pwede nila nga mahimo aron nga mabalik sa normal ang supply sa kuryente.
Tambag usab ni Gatchalian sa mga naapektuhan sa power crisis nga dili mabalaka tungod kay nagpahigayon naman sila og meeting para sa posibleng solusyon aron paspas nga mabalik ang kuryente sa mga apektadong lugar tungod sa linog.
