Cebu City– Sikop ang usa ka pamilya samtang na rescue naman ang 11 ka mga menor de edad human sa gipahigayon nga operasyon sa mga kapulisan sa lungsod sa Consolacion Probinsya sa Sugbo. Matud ni Police Inspector Roemeo Caacoy sa Consolacion PNP nga ang subject sa search warrant mao ang mag-tiayon nga Danilo ug Vilma Ereguero nga taga Pulpugan sa nahisgutang lungsod.
Matud pa ni Caacoy nga nakadawat sila og impormasyon gikan sa mga una na nilang nasikop nga mga menor de edad nga ang magti-ayon maoy gikuhaan nila sa supple sa illigal nga drogas. Gipaubos sa surveillance operation ang duruha ug sa dihang nag positibo sa gipahigayon nga test buy, gilusad dayon ang operasyon. Atol sa operasyon nasikop usab ang 4 ka anak sa magtiayong Ereguero nga sila si John Iva, 22 anyos, John Lester, 24 anyos Jerome 29 anyos ug Jenelyn Ereguero 32 anyos, pulos nakuhaan usab og ginadiling drogas. Nasakmit sa kapulisan ang kapin 60 gramos sa gituohang shabu nga nagkantidad og P700,000 , usa ka caliber 38 revolver ug mga bala.
Samtang, na rescue naman ang 11 ka mga menor de edad nga gigamit sa mag asawa nga runner sa ilang illegal nga negosyo. Ang mga menor de edad ang nag pangidaron lamang ug 8 anyos ang pinaka bata samtang 17 anyos ang pinakatiguwang. Gipaubos na sa profiling ang mga menor de edad nga na rescue og gikatakda nga e turn-over sa buhatan sa DSWD-7.Migawas usab sa imbestigasyon sa kapulisan , nga nahimo ng negosyo sa pamilya ang pagpamaligya og shabu diin matag semana maka dispose sila og kapin 100 gramos sa shabu.
Sa pagkakaron padayon pang gi imbestigaran sa kapulisan kung asa gikian ang supply sa mga dinakpan.
