CEBU CITY – Nakarekober na ang mga biktima sa bagyong Yolanda sa lungsod sa San Remigio lalawigan sa Sugbo.
Kini ang gibutyag ni San Remegio Mayor Mar Martinez.
Matud niya nga wala nay problema sa panginabuhi-an ang mga lumulopyo sa ilang lugar ang kuwang nalang mao ang housing project sa NHA.
Hinoon, nasugdan naman ang halus katunga sa mga nabiktima diin ang pagtukod nalang og balay ang kuwang.
Gitataw sa Mayor nga nagkalisod og kuha og yuta nga aduna nay titulo ang NHA mao nga lisod nga makapabarog dayon ug balay sa maong lugar.
Kini tungod kay usa sa mga rekisitos nga magbaton usa og yuta nga adunay titulo ang lumulopyo ayha pa sila matukuran ug balay ug matud sa mayor lisod kini para sa uban.
Hayan sa karon aduna 1,224 ka mga balay ang sugdan na sa pagtukod ug lauman nga mahuman kini sa dili pa matapos ang tuig 2018.
Nasayran nga 4 mil ka mga residente ang kinatibuk-ang naigo sa kadaot sa Yolanda sa San Remegio ug kung hingpit na na nga matabangan kining libuan, mas mamaayo na ang kahimtang sa ilang lugar.
Subay niini naka-amgo na usab matud pa ang mga tao didto sanglit dili na kini mukompyansa kung adunay mga kalamidad.
Gani sigon ni Martinez nga kung adunay pahimangno dali dayon kini sila nga manghiklin ngadto sa mga evacuation centers.
