Cebu City- Nasagmuyu ang Integrated Bar of the Philippines sa nahitabong pagpamanhig patay sa kauban nilang abogado nga si Atty Jonnah John Ungab.
Sa pakighinabi sa Bombo Radyo Cebu ngadto ni Attty. Gonzalo Malig-on, IBP Eastern Visayas Governor,gibutyag niini nga dili nila madawat ang nahitabo ni Atty Ungab hilabi na ug kung ang motibo sa pagpatay niini mao ang iyahang trabaho isisp usa ka manlalaban.
Matud pa ni Malig-on nga dili makiangayon nga himuong personal sa ilang mga makasumpaki sa korte ang ilahang trabaho. Gihimug-atan niini nga ang ingon ani nga mga panghitabo ang mahimo nga makahatag ug kahadlok sa mga abogado nga mubuhat sailang trabaho. Subay niini , matud ni Malig-on nga hanap na ang posibilidad nga mahatagan pa og hustisya ang mga nangayo niini kung wala nay abogado nga mudawat sa bisag unsa mang kaso.
Gipasabot ni Malig-on nga tuyo ug tumong lamang sa mga abogado nga mahatagan ug hustisya ang ilahang mga kliyente.
Nasayran nga gibanhigan patay si Atty Ungab kagahapong adlawa human sa hearing sa kliyente niini nga si Kerwin Espinosa sa Cebu Palace of Justice sa Qimonda Building dakbayan sa Sugbo.
