CEBU CITY – Midepensa si Ronda Mayor Mariano Blanco sa giingung politika ang hinungdan sa kamatayun ni Atty. Jonnah John Ungab.
Sa pakighinabi sa Bombo Radyo Cebu kang Mayor Blanco, gibutyag niini nga dili niya kayang ipapatay ang mismong pag-umangkon ug bise mayor nga si Atty. Ungab.
Kini ang nahimung tubag sa mayor human sa pamahayag sa pamilyang Ungab nga gipapatay ang abogado gumikan sa pagbani-ug sa ngalan niini nga mudagan pagka-mayor sa lungsod sa Ronda sa 2019 election.
Gihimug-atan ni Ungab nga wala bisan ka-usa nga adunay patay sa ilahang lungsod nga election-related killings gumikan kay giingung mga peace-loving citizens ang mga taga-Ronda.
Giklaru usab niini nga wala man sila’y personal nga panagbangi ni Atty. Ungab ug magpamatu-ud niini ang iyahang pagtabang sa abogado sa pagdagan niini pagka-konsehal ug pagka-bise mayor sulud sa tulo ka termino.
Subay niini, adunay pagduda ang mayor nga ang napildi niini sa mayorial race nga si Moymoy Ungab kinsang igsu-un ni Atty. Ungab ang nag-link kaniya sa krimen.
Gitu-uhan sa mayor nga layo ra sa tinu-ud nga politika ang hinungdan sa krimin nga nahitabu nga gikamatay sa iyahang bise mayor.
Samtang naka-half mast usab karun ang lungsod sa Ronda ug mila-um usab sila nga haya-un si Atty. Ungab sa ilahang Municipal Session Hall bisan usa lang kaadlaw.
