Cebu City- Gipagawas sa kapulisan sa Cebu City Police Office , Taskforce Ungab ang hulagway sa duha ka persons of interest nga gikonsederar karon sa kaso sa pagpatay ni Atty Jonnah John Ungab.
Matud ni Police Chief Inspector Jonathan Taneo nga base sa kuha sa cctv duol sa nahitabuan sa krimen, nasuta nga opaingon sa Mandaue area ang direksyon nga gisubay sa gunman nga misakay sa motorsiklo.
Subay niini makig-alayon ang taskforce ngadto na sa Mandaue City Police Office, Lapulapu City Police Office ingon man sa Cebu Provincial Police Office aron nga matabangan sila sa pag identify sa mga suspek.
Matud ni Taneo nga ang kuha sa cctv ang gikinahanglan pa nga suportahan ug dugang nga mga ebedensya aron masuta gayud ang identity sa mga suspek. Gibutayg usab ni Police Supt Ryan Devaras, ang pangulo sa Taskforce Ungab nga base sa ilang pag-analisar sa mga suspek , dako ang posibilidad nga usa kato ka hitman nga gibayaran aron sa pagpatay sa abogado.
Dugang pa niini nga mao ra gihapon ang mga motibo nga ilang gitan-aw ; work related, personal grudge ug pulitika. Gipukusan karon sa taskforce mao ang pag identify ug pagsikop sa mga suspect.
Subli nga nanawagan ang kapulisan sa kung kinsa man ang dunay ihibalo sa panghitabo nga makig-alayon lang sa mga ,kapulisan o sa NBI nga maoy nagkupot karon sa imbestigasyon sa kaso.
Gibutyag usab ni Devaras nga duna silay koordinasyon sa NBI kabahin sa ilang gipahigayon nga imbestigasyon.
