CEBU CITY –Gipusil patay ang usa ka former pulis gahapong adlawa sa Barangay Totolan, Dauis, probinsya sa Bohol. Samtang patay usab ang guard sa buwangan human kini misuway ug harang sa suspetsado.
Giila ang ex-police nga si Zandro Zamora, 34 anyos, residente sa nahisgutang dapit ug kaniadtong nadestino sa Tagbilaran Police Station ingun man giila usab ang guard sa tarian nga si Paterna Acuna, 48 anyos, ug residente sa Barangay Fatima, Cortes sa maong probinsya.
Matud ni SPO2 Jose Pogoy, ang desk officer sa Dauis Police Station nga padung na unta sa buwangan ang biktimang pulis sakay sa motor niini apan gisundan kini sa matud pa wala pa mailhi nga riding in tandem ug kalit nga gipusil.
Matud pa nga nakasulod pa sa buwangan ang pulis nga biktima apan gitiwasan pa gayud kini ug pusil sa suspetsado. Human sa maong pagpamusil, padung na unta gawas ang mga suspetsado sa buwangan apan giharangan kini sa tigbantay hinungdan nga gipusil usab kini.
Dugang pa ni Pogoy nga dead on the spot ang pulis nga target sa mga suspetsado samtang dead on arrival usab ang nadamay sa maong insidente human kini gisuway pa ug dala sa tambalanan.
Nakuha sa crime scene ang usa ka cellphone ug usa ka gamay nga sachet sa gituohan nga shabu nga nakuha gikan sa pulis nga biktima.
Sa pagkakaron, padayun pa ang imbestigasyon sa kapulisan ug pagsuta sa pagbanhig patay sa maong kanhi pulis sa nahisgutang dapit.
