Cebu City– Muabot sa 1.1 million pesos ang kantidad sa iligal nga drogas ang nasakmit sa Consolacion Cebu PNP human ang gipahigayong buybust operation sa Brgy. Pulpugan.
Giila ang subject nga si Chris Ortega, residente sa naasoy ng lugar ug ang duha pa nga kaubanan niini kung diin nakuha gikan kanila ang 3 ka gagmayng pakete sa shabu nga nag kantidad lang og 1,700 pesos.
Apan matud ni Police Chief Inspector Gerald Pelare ang hepe sa Consolacion PS nga atol sa gipahigayong tactical interrogation sa subject, gi-angkon niini ug mibutyag nga duna silay gitago-an nga shabu sa imburnal.
Dali nga gi-ubanan sa PNP si Ortega ug ingon man sa mga opisyal sa barangay ug didto narecover nila ang 4 ka dagkong pakete sa shabu nga adunay gibug-aton nga 100 grams nga gisulod sa usa ka asul nga pouch.
Sa karon nagtingkagol na sa lock-up cell ang mga dinakpan ug padayon ang ilang imbestigasyon kung diin gikan ang maong mga shabu.
