Cebu City-Gikumpirmar ni Brgy Pajo Kapitan Jonard Chan , nga gipaubos na sa state of calamity ang ilang barangay gumikan sa nahitabong sunug kagabie sa Sitio Paradise .
Matud ni Kapitan Chan nga kagabie dayon ilang gipang andam ang mga gikinahanglan dokumento aron sa pag declarara sa state of calamity. Samtang gikumpirmar usab niini nga namatay gayud sa nahitabong sunug ang duha ka bata nga missing kagabie.
Ang duha ka mga bata ang nag edad ug 1 ka tuig ug 3 ka tuig nga pulos anak ni Jennifer Caniedo kinsang balay maoy gitudlong sinugdanan sa sunug. Ang mga managsuon mao sila Yuko Han Caniedo ug Clint Cyril Caniedo. Matud ni Kapitan Chan nga naapil kapaig ang 2 ka mga bata human nga wala na kini maluwas pa sa ilahang inahan. Matud pa niini nga dunay nakakita sa bata nga nagdula ug kayo nga maoy hinungdan sa pag ka-abo sa dili muubos sa 300 ka mga panimalay.
Matud pa sa Kapitan nga ang panimalay sa mga Caniedo ang nalakip sa ilang listahan sa mga nalabigit sa iligal nga drogas . Sa pagkakaron temporaryo usa nga gipahiluna sa ilang barangay gymn ang mga apektadong residente.
