CEBU CITY-Nagpahigayon og surprise greyhound ang operatiba sa Bureau of Jail Management and Penology,PNP, Regional Special Operations Group (RSOG) ug PDEA-7 sa Cebu City Jail kaganinang sayo sa buntag kung diin nasakmit ang 12 ka mga cellphones, 20 mga sigarilyo, mga lighter ug mga deadly weapon.
Matud ni Jail Warden Supt. Renante Rubio nga gihimo nila kini sanglit nakadiskubre sila og bago nga modus sa mga inmate para makasulod ang mga cellphones ilabina ang mga sigarilyo.
Nasayran nga sa una iitsa lang matud pa sa mga naa sa gawas ang mga cellphone ug sigarilyo ngadto sa sulod sa City Jail apan sa dihang gibutangan na og net ang fence sa mga personnel sa city jail nangita na og bago nga pamaagi ang mga inmate.
Sigon pa usab ni Rubio nga adunay nay gitawag ang mga inmate og ‘fishing’ kung diin magtagak kini sila ng nylon sa para didto ihigot ang mga sigarilyo ug uban pa nga kontrabando.
Matud pausab sa mga mga jail guards nga nakakita sa maong modus nga dili nila basta-basta magunitan ang nylon sanglit gipahiran kini og hugaw sa tao.
Ipaubos karon sa forensic examination ang nakuha nga mga kontrabando gikan sa nahisgutang greyhound.
